D'oscail an tAire Stáit, Dara Calleary TD Tionscadal Uasghrádaithe nua an N17/R320 ag Lios Dubh go hoifigiúil inniu (Dé hAoine, an 28 Iúil 2023).
Ba é an tAire Stáit Calleary, in éineacht leis an gCllr Michael Loftus, Cathaoirleach Chomhairle Contae Mhaigh Eo, a rinne an oscailt oifigiúil. Is é an t-acomhal uasghrádaithe an tionscadal is mó atá maoinithe go dtí seo ag Rannóg Sábháilteachta Bhonneagar Iompair Éireann.
Mar thoradh ar an uasghrádú acomhal laghdófar rochtain dhíreach agus cuirfear deireadh le casadh ar dheis ar an N17 i gcomharsanacht an uasghrádaithe, rud a fheabhsóidh sábháilteacht do gach úsáideoir bóthair trí mhinicíocht agus déine imbhuailtí a laghdú.
Bhí an suíomh aitheanta mar Shuíomh Ard-Imbhuailte in 2018 ag anailís braisle imbhuailtí BIÉ agus lean staidéar féidearthachta a mhol an scéim feabhsúcháin nua seo.
Tógadh 0.85km de nascbhóithre san iomlán agus tardhroichead a tógadh thar an N17, mar aon le dhá thimpeallán a shuiteáil agus acomhal reatha an N17/L/5565-0 ag Bóthar Mhíleac Mór a dhúnadh.
Rinne Oifig Bóithre Náisiúnta (NRO) Chomhairle Contae Mhaigh Eo bainistiú ar an tionscadal, a bhí á threorú ag grúpa stiúrtha a bhí comhdhéanta de bhaill an NRO, Barry Transportation Consulting agus bainistíocht shinsearach ó Chomhairle Contae Mhaigh Eo agus BIÉ. Bronnadh an conradh tógála ar BAM Ltd i mí na Samhna 2021, agus rinne siad maoirseacht ar thógáil na scéime.
Dúirt an tAire Stáit Calleary agus é ag labhairt ag oscailt an uasghrádaithe nua:
Is onóir é an t-uasghrádú ar Acomhal an N17/R320 ag Lios Dubh a oscailt go hoifigiúil inniu. Mar a bheidh a fhios ag go leor sa phobal is uasghrádú é seo a bhfuil géarghá leis agus go gcruthóidh sé sábháilteacht ar bhóithre do gach úsáideoir bóthair. Tá tionchar tubaisteach ag imbhuailtí bóthair ar dhaoine aonair, ar a dteaghlaigh, agus ar a bpobail. Tá roinnt imbhuailtí contúirteacha feicthe sa limistéar seo a raibh gortuithe tromchúiseacha agus fiú bás mar thoradh orthu, an tráth is déanaí in 2017, ach tá súil agam go laghdóidh na feabhsuithe a rinneadh faoin uasghrádú imbhuailtí agus go mbeidh an bóthar seo níos sábháilte do chách. Ba mhaith liom buíochas a ghabháil leo siúd go léir a bhfuil baint acu leis an uasghrádú tábhachtach seo a sheachadadh, agus a mbeidh sábháilteacht ar bhóithre mar thoradh ar a gcuid oibre agus a ndúthracht.
Dúirt an Cathaoirleach, an Comhairleoir Loftus:“Ba phribhléid mhór é mar Chathaoirleach ar Chomhairle Contae Mhaigh Eo a bheith anseo inniu ag oscailt oifigiúil an uasghrádaithe nua seo. B'fhéidir gur mionphíosa infreastruchtúir é seo dóibh siúd nach bhfuil mórán eolais acu faoin scéim seo, ach is cúis áthais dom na feabhsuithe a thabharfaidh sé seo ar shábháilteacht bóithre sa limistéar seo agus sa chontae i gcoitinne a fheiceáil. Is príomhbhealach é an N17 isteach agus amach as Maigh Eo agus baineann na mílte feithiclí úsáid as gach lá. Tharla timpiste tragóideach ag an láthair seo in 2017, nuair ar chaill triúr a mbeatha agus má shábháiltear fiú saol amháin amach anseo a bhuíochas leis an uasghrádú seo beidh sé ina infheistíocht fhiúntach don chontae.
Dúirt Príomhfheidhmeannach Chomhairle Contae Mhaigh Eo, Kevin Kelly:“Tá ríméad ar Chomhairle Contae Mhaigh Eo an t-uasghrádú nua seo a fheiceáil oscailte anseo inniu. Tá tionscadal curtha i gcrích ag an Oifig um Bóithre Náisiúnta in éineacht leis na comhairleoirí, BIÉ agus na conraitheoirí a chuirfidh feabhas ollmhór ar an gcuid seo den N17 do gach úsáideoir bóithre agus níos tábhachtaí fós a mhéadóidh sábháilteacht bóithre. Ba mhaith liom buíochas a ghabháil le gach duine a raibh baint acu leis an tionscadal seo, agus go háirithe leis an 22 úinéir talún a ndeachaigh sé i bhfeidhm orthu agus leis an daonra áitiúil go léir a bhí taobh thiar den tionscadal seo ó bunaíodh é go dtí a sheachadadh anseo inniu.
Dúirt Ceannasaí Caipitil Bóithre agus Glasbhealaí BIÉ Geraldine Fitzpatrick: Is é an príomhfhócas BIÉ agus ag ár gcomhpháirtithe Údaráis Áitiúil agus muid ag tabhairt faoi aon tionscadal bóithre ná sábháilteacht úsáideoirí bóithre a fheabhsú. Is sampla den scoth é Uasghrádú Acomhal N17/R320 ag Lios Dubh den chaoi a rachaidh seachadadh tionscadail ar an scála seo chun tairbhe suntasach sábháilteachta d’úsáideoirí bóithre.
Dúirt lasdair Henderson, Stiúrthóir Feidhmiúcháin, BAM Ireland: “Tá ríméad ar ár bhfoireann go bhfuil an t-uasghrádú criticiúil acomhal seo déanta againn do Chomhairle Contae Mhaigh Eo. Ba mhaith linn ár mbuíochas a chur in iúl do na foirne go léir a bhí páirteach agus don phobal áitiúil as a dtacaíocht chun an píosa infreastruchtúir tábhachtach seo a sheachadadh go rathúil a chuirfidh feabhas suntasach ar shábháilteacht úsáideoirí feithiclí, coisithe agus rothaithe sa cheantar."
Chun tuilleadh eolais a fháil, téigh
anseo.