Bainistíocht Taighde

Tá TII tiomanta do bhuiséad taighde, a úsáidfear chun Clár Taighde leanúnach a mhaoiniú, a bhunú agus a chothabháil.

Cuirfear an Clár Taighde le chéile gach bliain agus déanfar foráil do thionscadail ghearrthéarmacha gnó chun freastal ar riachtanais ar leith agus ar thaighde bunúsach atá níos fadtéarmaí.  Clúdóidh an clár gach gné de leasa an Údaráis. Déanfaidh Bainisteoir Taighde TII an buiséad taighde a bhainistiú agus tabharfaidh saineolaithe an Údaráis comhairle theicniúil agus bhainistíochta.

Téamaí Polasaí

Úsáideadh Iompar 21 agus an Plean Forbartha Náisiúnta chun roinnt "téamaí polasaí" leathana a fhorbairt le haghaidh straitéis taighde a chur le chéile chun cabhrú le TII a spriocanna straitéiseacha a bhaint amach. Beidh na téamaí seo dírithe ar an ngá le bheith ag iarraidh i gcónaí éifeachtúlacht, inbhuanaitheacht agus sábháilteacht a fheabhsú i ngach réimse gníomhaíochta de chuid an Údaráis agus baineann siad le hábhair, caighdeáin agus nósanna imeachta i gcomhthéacs togáil, cothabháil agus oibríocht bóithre. Is iad na téamaí polasaí;

• Ábhair: Ábhair nua thógála a fhorbairt; úsáid níos éifeachtúla a bhaint as ábhair atá ann cheana; ábhair nádúrtha atá tearc a chaomhnú; ábhar in-athchúrsáilte a úsáid; marthanacht, deisiú agus cothabháil.
• Caighdeáin agus sonrúcháin: Caighdeáin suas chun dáta a choinneáil; caighdeáin agus sonrúcháin nua a fhorbairt bunaithe ar fhorbairtí nua; nuálaíocht a spreagadh.
• Timpeallacht/Tógáil inbhuanaithe: Cuimhneamh ar cheisteanna timpeallachta; tionchair athrú aeráide; bealaí chun ídiú fuinnimh a laghdú; acmhainní nádúrtha a chaomhnú; malairt foinsí fuinnimh; réitithe "glasa"; cuimhneamh ar ídiú fuinnimh sa chiall is leithne dála leagan amach acomhail etc; tionchair teicneolaíocht feithiclí agus breoslaí malartacha a thuiscint; marthanacht bhóithre agus droichead; modhanna agus nósanna imeachta monatóireachta agus cigireachta a fhorbairt mar chuid de chóras inbhuanaithe bainistíocht sócmhainní.
• Sábháilteacht. Páirt an bhonneagair i dtaismigh agus básanna; sábháilteacht fheabhsaithe d'úsáideoirí bóithre; friotaíocht in aghaidh sciorradh; idirghníomhaíocht idir bóthar, feithicil agus tiománaí; iompar an tiománaí a thuiscint; sábháilteacht struchtúir a fheabhsú; sábháilteacht éigníomhach a fhorbairt; rioscaí a bhaineann le torann agus truailliú cothaithe ag an trácht; bainistíocht eachtraí.
• Luach ar airgead: Feabhas ar iomaíochas domhanda; modhanna soláthair; aithint agus dáileadh riosca; nósanna imeachta níos éifeachtaí um bainistíocht sócmhainní; úsáid níos fearr as an mbonneagar atá ann cheana; réimis chothabhála dhírithe; múnlú agus pleanáil fheabhsaithe tráchta.
• Iompar agus úsáid talún: Tuartha fáis ar thrácht; Glacadh talún ag acomhail scartha; tionchar a imirt ar iompar tiománaithe; múnlaí tráchta a fhorbairt; córais chliste iompair; córais chomhtháite iompair; staidéir idirmhódúil.
• Oidhreacht: Tionchar na mbóithre ar an tsochaí a mheas, chomh maith le modhanna le haghaidh iniúchtaí seandálaíochta agus ceisteanna sóisialta eile.

Tugtar leis na téamaí polasaí seo creat inar féidir gníomhaíochtaí taighde an Údaráis a chur ar siúl. Tugann siad bunús forbartha don Chlár Taighde Bliantúil, arbh é a phríomhaidhm cúnamh a thabhairt d'fhoireann TII córas bóithre náisiúnta a sholáthar ar bhealach níos éifeachtúla agus níos éifeachtaí.

Cumarsáid

Forbraíodh córas cumarsáide san Údarás chun malartú faisnéise a bhaineann le gníomhaíochtaí taighde a éascú. Is é is cuspóir leis ná riachtanais agus smaointe taighde a bhailiú, moltaí a mheasúnú, tús áite a thabhairt do thionscadail, bainistíocht theicniúil níos éifeachtaí a sholáthar, agus torthaí an Chláir Taighde a scaipeadh.

Cuireadh an gréasán taighde le chéile chun cur chuige barr go bun agus bun go barr araon a chothú. Leis an gcur chuige barr go bun, forbrófar tionscadail phóitéinsiúla a éiríonn as spriocanna ardleibhéil an Údaráis. Leis an gcur chuige bun go barr, aithneoidh saineolaithe teicniúla an Údaráis, tionscadail taighde chun fadhbanna áirithe a réiteach nó chun cúnamh a thabhairt maidir le próisis a chur i ngníomh ar bhealach níos éifeachtaí. Sa dá chás, beidh na spriocanna ardleibhéil mar bhonn faoi na gníomhaíochtaí taighde agus beidh mar údar dóibh.

Déanfaidh an Bainisteoir Taighde cúrsaí cumarsáide a bhaineann leis na gníomhaíochtaí taighde a bhainistiú le cúnamh ó na Tacaitheoirí Taighde i réimsí éagsúla teicniúla. Bainfear úsáid as inlíon TII chun an fhaisnéis a scaipeadh san Údarás.

Tá gá le cumarsáid chun páirtithe leasmhara a chur ar an eolas (baill den phobal, ollscoileanna, institiúidí, sainchomhairleoirí, conraitheoirí, comhlachtaí leasmhara eile) maidir le Straitéis Taighde an Údaráis agus an fhianaise agus an réasún atá mar bhonn faoi. Tá sé i gceist gréasán seachtrach a fhorbairt le go mbeifear in ann eolas faoi na gníomhaíochtaí taighde a scaipeadh go forleathan. Úsáidfear suíomh gréasáin TII chun poiblíocht a thabhairt don Chlár Taighde agus chun torthaí an taighde a sholáthar. Cuirfear torthaí an taighde chun cinn freisin le hirisí, le léirithe ag seimineáir agus ag comhdhálacha.

Eagraíocht Inmheánach

Is é Bainisteoir Taighde TII atá  freagrach go díreach as Clár Taighde an Údaráis agus is é a bhainistíonn an Clár Taighde ó lá go lá. Faigheann an Bainisteoir Taighde tacaíocht ar bhonn páirtaimseartha ó shainfhoireann a fheidhmíonn i réimsí éagsúla san Údarás agus a chuireann comhairle theicniúil agus bhainistíochta ar fáil.

Bainisteoir Taighde

Meantóirí Taighde

Tá sé riachtanach go mbeadh Clár Taighde neadaithe i gceart i gcroíghníomhaíochtaí an Údaráis agus go scaipfear torthaí an taighde agus na comhairleorachta ar chóid, ar chaighdeáin agus ar chleachtais, agus go mbeidh ceangal soiléir idir an Clár Taighde agus an fhoireann atá freagrach as caighdeáin agus as réimsí áirithe sainiúlachta san Údarás. Mura ndéanfar clár taighde urraithe agus sainchomhairle theicniúil TII a chomhtháthú i gceart i ngnéithe éagsúla de chroíghníomhaíochtaí an Údaráis, laghdófar go mór ar leasa cláir dá leithéid.

Chun an ceangal idir taighde agus croíghníomhaíochtaí a bheith ann, bunaíodh gréasán inmheánach de Mheantóirí Taighde. Is iad príomhfheidhmeanna na Meantóirí Taighde:

• Coinneáil suas leis an eolas ar threochtaí domhanda sa taighde ina réimsí féin speisialachais
• Coinneáil suas leis an eolas ar fhoilseacháin taighde a cuireadh amach le gairid in irisí, ag comhdhálacha etc.
• Tosaíochtaí taighde a aithint ina réimsí freagrachta féin.
• Obair go dlúth leis an mBainisteoir Taighde maidir le tionscadail taighde agus sainchomhairle, lena n-áirítear athbhreithniú agus tráchtaireacht ar dhréachthuarascálacha agus measúnú ar fheidhmíocht soláthraithe seirbhísí.
• Cur i bhfeidhm agus scaipeadh éifeachtach na dtorthaí taighde trí chaighdeáin agus trí fhoilseacháin an Údaráis a chinntiú.

Clúdaíonn an liosta seo formhór de phríomhréimsí spéise an Údaráis. Cuirfear leis áfach chun freastal ar éilimh, agus d'fhéadfaí Meantóirí seachtracha a thabhairt isteach más cuí, e.g. eolaíochtaí iompraíochta.

Táscairí Feidhmíochta

Is deacair caighdeán taighde a thomhas toisc go dtógann sé na blianta uaireanta sula gcuirtear i bhfeidm iad agus go bhfeictear na leasa atá le baint. Ní mór foireann taighde den scoth a bheith ann chun taighde den scoth a chinntiú. Sa phróiseas roghnaithe, cuirfear béim ar theist na foirne taighde agus ábharthacht a dtorthaí taighde ó thaobh spriocanna an Údaráis de. Cinnteofar luach ar airgead tríd an iomaíocht agus an trédhearcacht sa phróiseas measúnaithe agus roghnaithe.

Tá an Bainisteoir Taighde agus an Meantóir Taighde freagrach as gach tionscadail aonair a bhainistiú. Déanann coiste Iniúchóireachta Bhord TII monatóireacht ar dul chun cinn an Chláir Taighde. Tomhaistear feidhmíocht tríd na nithe seo a leanas a thuairisciú:

• Líon na dtionscadal a coimisiúnaíodh
• Líon na dtionscadal a seachadadh
• Líon na dtuarascálacha agus na bpáipéar a foilsíodh
• Cáilíocht na dtorthaí taighde
• Cur i bhfeidhm na dtorthaí taighde

Soláthar

Lorgóidh an tÚdarás léirithe spéise i dtionscadail taighde faoi théamaí leathana polasaí a ndéantar cur síos orthu in Téamaí Polasaí. Laistigh de gach réimse ábhair d'fhéadfadh roinnt tionscadal aonair taighde a bheith ann le cuspóirí ar leith, spriocanna ar leith le soláthar agus scála ama. Is féidir na tionscadail  a sholáthar mar choimisiúin aonair nó le chéile i bpacáistí: más i bpacáistí iad na topaicí taighde tabharfaidh sé deis don Údarás díriú ar an sainchomhairle is fearr dá bhfuil ar fáil i ngach sainréimse ábhair.

Déanfar soláthar tríd gnáthchleachtais soláthair TII. Roghnófar na solátharaithe roghnacha seirbhísí ar bhonn comórtais oscailte a fhógrófar ar shuíomh gréasáin an TII, in irisí násiúnta agus idirnásiúnta agus san Iris Eorpach, faoi mar is cuí. Cinnteoidh an iomaíocht, atá bunaithe ar cháilíocht agus ar phraghas, idir na soláthraithe go bhfaighfear luach ar airgead.

I gcásanna áirithe d'fhéadfadh sé bheith oiriúnach próiseas difriúil soláthair a úsáid. Samplaí is ea:

• Más leanúint ar obair a rinneadh cheana é an tionscadal, agus gur gá cloí leis an bhfoireann chéanna, d'fhéadfadh sé a bheith oiriúnach institiúid nó duine ar leith a choimisiúnú chun an obair a dhéanamh,
• Tionscadail Comhoibrithe, más comh-mhaoinitheoir é an tÚdarás nó má tá an tÚdarás ag tabhairt maoiniú "breisithe" do thionscadal atá ann cheana féin.

Sna cásanna seo lorgófar ceadú ón bpríomhfheidhmeanach don mhodh soláthair atá molta.

Bainistíocht Taighde