Tuarascáil 2025 ar Ghníomhaíocht Chlár na Scéimeanna Feabhsúcháin um Shábháilteacht ar Bhóithre foilsithe ag BIÉ

Tá Bonneagar Iompair Éireann (BIÉ) tar éis a dTuarascáil 2025 ar Ghníomhaíocht Chlár na Scéimeanna Feabhsúcháin um Shábháilteacht ar Bhóithre a fhoilsiú, inar leagadh amach mar a dhéantar rioscaí maidir le sábháilteacht ar bhóithre a shainaithint, a rangú de réir tosaíochta agus a láimhseáil.

Déanann BIÉ meánfhigiúr de €26 milliún a infheistiú gach aon bhliain trí Chlár na Scéimeanna Feabhsúcháin um Shábháilteacht ar Bhóithre. In 2025, rinneadh breis agus 210 scéim feabhsúcháin sábháilteachta a chur chun cinn ar fud an stáit, agus níos mó ná 80 scéim ag céim na tógála agus ag céim an chlabhsúir. Téann na scéimeanna seo i ngleic le réimse leathan rioscaí ar an ngréasán, lena n-áirítear sábháilteacht ag acomhail, guaiseacha thaobh an bhóthair, bainistiú luais agus acmhainní d’úsáideoirí bóthair leochaileacha.

Cuimsíonn an tuarascáil seo comhthéacs beartais, anailís bunaithe ar shonraí agus seachadadh cláir, lena léiriú mar a fhorbraítear tosaíochtaí sábháilteachta ar bhóithre ón bhfianaise agus an measúnú a fhad le scéimeanna maoinithe agus feabhsúcháin áitiúla. Tugann sé léargas dúinn ar an gcaoi a dtreoraítear infheistíocht phoiblí chuig na háiteanna is mó riosca agus mar a sholáthraítear torthaí sábháilteachta trí chomhpháirtíocht láidir agus comhoibriú le gach ceann den 31 Údarás Áitiúil.

Arna forbairt ag Foireann Sábháilteachta ar Bhóithre BIÉ, i gcomhpháirt le hInnealtóirí Réigiúnacha um Shábháilteacht ar Bhóithre, cuimsíonn an tuarascáil gníomhaíocht chláir le linn 2025 agus léiríonn na bealaí a n-úsáidtear anailís ar imbhuailtí, cigireachtaí sábháilteachta ar bhóithre agus an Measúnú ar Shábháilteacht ar Bhóithre Fud Fad an Ghréasáin chun infheistíocht a rangú de réir tosaíochta i gcomhréir le Treoir an AE Maidir le Sábháilteacht an Bhonneagair Bóthair a Bhainistiú.

Tacaíonn Clár na Scéimeanna Feabhsúcháin um Shábháilteacht ar Bhóithre leis an Sprioc Sábháilteachta a bhí ag BIÉ ina Ráiteas Straitéise 2026–2030 agus cuireann le Straitéis Sábháilteachta ar Bhóithre na hÉireann 2021–2030, arb é is aidhm léi básanna agus tromghortuithe ar bhóithre a laghdú de leath faoi 2030 agus aistriú a dhéanamh i dtreo Fís Nialasach faoi 2050. Beidh Tuarascáil Ghníomhaíochta an Chláir ar fáil ag an gComhdháil um Bóithre Níos Sábháilte 2026 – Sábháilteacht ar Bhóithre, i gCill Airne, Co. Chiarraí, ar an 11 agus an 12 Márta, ag a mbeidh baill d’fhoireann Sábháilteachta ar Bhóithre BIÉ i láthair chun an tuarascáil a phlé agus chun tuairisciú a dhéanamh ar chur chuige na tuarascála i leith bóithre níos sábháilte a sheachadadh ar bhonn náisiúnta.

Naisc Ghaolmhara: Tuarascáil 2025 ar Ghníomhaíocht Chlár na Scéimeanna Feabhsúcháin um Shábháilteacht ar Bhóithre

Published: 09.03.2026